రావి చెట్టును పూజించడం వెనుక... సనాతన, సాంప్రదాయ, శా

ప్రకృతిని ఆరాధించడం సనాతన భారతీయ సంప్రదాయంలో ఓ భాగం. అందులోనూ చెట్లను పూజించడం ఆనవాయితీగా వస్తోంది. అగ్ని హోత్రం నిర్వహించడం, పుత్రుడిని కనడం కంటే, బాటలో నీడనిచ్చే మహా వృక్షాలను నాటడం పుణ్యకరమని భవిష్యపురాణం అంటోంది. చెట్లు ఇహ, పరలోకంలో సుఖానిచ్చే సత్పుత్రులతో సమానమని, దేవ, నాగ, గంధర్వ, కిన్నెర, రాక్షసులకు నిలయమై పితృదేవతలను తృప్తి పరుస్తాయని అందులో చెప్పబడింది. వాటిలో రావి చెట్టు ప్రకృతిలోని పావన వృక్షాలలో ఒకటి. పురాణాలలో రావి చెట్టు విశిష్టత గురించి అనేక విధాలుగా ప్రస్తావనలో ఉంది. రావి చెట్టుని విష్ణు స్వరూపంగా పూజిస్తారు. అనేక సందర్భాలలో రావి చెట్టును పూజించే సంప్రదాయం ఉంది. రావి వృక్షాన్ని అశ్వథ వృక్షమని కూడా అంటారు. రావి చెట్టు మొదట్లో విష్ణువు, బోదెలో కేశవుడు, శాఖలో నారాయణుడు, పత్రాలలో హరి, ఫలాల్లో సర్వ దేవా సాహితుడైన అచ్యుతుడు నివసిస్తారు. ఇది రూపం దాల్చిన విష్ణు స్వరూపం.
మహాత్ములు దీనిని పుణ్య మూలమని సేవిస్తారు. రావి చెట్టును పూజించడం వల్ల అభీష్ట సిద్దితోపాటు పాప నాశనం కలుగుతుంది. బ్రహ్మ పురాణం ప్రకారం శ్రీమహావిష్ణువు జన్మస్థలం రావిచెట్టు. అంతేకాదు శ్రీమహాలక్ష్మీ సైతం దీనిపై నివాసం ఉంటుంది. త్రిమూర్తులు తమ దివ్యాయుధాలను రావి చెట్టుపైనే ఉంచుతారని ప్రతీతి. రావణుడి చెరలో ఉన్న సీతాదేవి సైతం రావి చెట్టు నీడనే ఉండేదట. అందుకే హనుమంతుడికి అశ్వథ వృక్షమంటే మహాప్రీతి. రావి చెట్టును పూజిస్తే శనీశ్వరుని బాధలు తొలగిపోతాయి. లక్ష్మీకటాక్షం, సంతాన ప్రాప్తి, వివాహంలో ఎదురవుతున్న సమస్యలు తొలగిపోతాయి.
వాతావరణ కాలుష్యం, రోగకారక కీటకాలను నాశనం చేసే శక్తి దీనికి ఉంది కాబట్టే దేవతా వృక్షంగా భావిస్తారు. ధార్మిక విశ్వాసం గల హిందువులు దీనిని దేవాలయ పరిసరాల్లో నాటుతారు. ఈ వృక్షానికి హాని చేయడం బ్రహ్మ హత్యతో సమానంగా పరిగణిస్తారు. వైజ్ఞానిక పరంగా రావిచెట్టు నిరంతర ప్రాణ వాయువుని వెలువరించే ఏకైక అద్భుత వృక్షం. దీని సమీపంలో ఉండటం వల్ల ప్రాణ శక్తి వృద్ది చెందుతుంది. రాత్రిపూట ఆక్సిజన్ విడుదల చేసే అతి తక్కువ వృక్షాల్లో ఇది కూడా ఒకటి.

Comments

Popular Posts