ఈ లక్షణాలు ఉంటే అది అయోడిన్ లోపమే.

థైరాయిడ్ గ్రంధి సరైన మోతాదులో హార్మోన్లను విడుదల చేయాలంటే అయోడిన్ అవసరం తప్పనిసరి. తగిన మోతాదులో ఆయోడిన్ అందకపోతే హైపోథైరాయిడ్‌కు దారితీస్తుంది. థైరాయిడ్ గ్రంధి ఉత్పత్తి చేసే హార్మోన్లు శరీర జీవక్రియలను నియంత్రిస్తాయి. అయోడిన్ లోపం వల్ల కలిగే లక్షణాలపై కాస్తంత అవగాహన ఉంటే దాన్ని అదుపులో ఉంచుకోవచ్చు.

థైరాయిడ్ గ్రంధి సక్రమంగా పనిచేయాలంటే అయోడిన్ తప్పనిసరి. దీని స్థాయిలు ఎక్కువ లేదా తక్కువైనా థైరాయిడ్ సమస్యలకు దారితీస్తుంది. ఒకవేళ అయోడిన్ లోపానికి గురైతే థైరాయిడ్ గ్రంధి వాపు వచ్చి పెద్ద కణితి  లాగా మారుతుంది. ఇలాంటి లక్షణాలను గమనించిన వెంటనే వైద్యుడిని సంప్రదించి తగిన జాగ్రత్తలను తీసుకోవాలి.

అయోడిన్ లోపం అనేది థైరాయిడ్‌తోపాటు ఇతర శరీర భాగాలపై కూడా ప్రభావం చూపుతుంది. ఇది మలబద్దకానికి కూడా దారితీస్తుంది. మలబద్దకంతో ఇబ్బంది పడేవారు అయోడిన్ ఎక్కువ ఉండే ఆహార పదార్థాలను తీసుకుంటే ఫలితం ఉంటుంది.

కొందరు కొద్ది దూరం నడిచినా లేదా బరువులు ఎత్తినా వెంటనే అలసిపోతారు. తరచూ ఇలా జరిగితే దీన్ని ఆయోడిన్ లోపంగా భావించవచ్చు.

అయోడిన్ లోపం వల్ల తీవ్ర ఒత్తిడి, ఆందోళనతోపాటు డిప్రెషన్ లాంటి సమస్యల భారిన పడతారు. ఇలాంటి మానసిక రుగ్మతలతో మీరు బాధపడితే వెంటనే వైద్యుడిని సంప్రదించాలి. ఈ రోజుల్లో మానసిక సమస్యలు సర్వ సాధారణం. ఒకవేళ ఏ కారణం లేకుండా, మానసిక అస్థిరతకు గురైతే మాత్రం తక్షణమే డాక్టర్‌ను కలవాలి.

గర్భిణీల్లో అయోడిన్ లోపం ఉంటే అబార్షన్ జరగడమే కాదు, ఒక్కోసారి గర్భస్థ శిశువు కూడా మరణించే అవకాశం ఉంటుంది. కాబట్టి గర్భం దాల్చిన మహిళలు రోజువారీ ఆహారంలో అయోడిన్ తగిన మోతాదులో ఉండేలా చూసుకోవాలి.

కారణాలు లేకుండా మీ శరీర బరువు అకస్మాత్తుగా పెరిగితే అయోడిన్ లోపం కూడా ఒక అంశంగా గుర్తించాలి. ఇలాంటి లక్షణాల్ని గమనిస్తే వెంటనే వైద్యుడిని కలిసి తగిన చికిత్స తీసుకోవాలి.


అయోడిన్ లోపంతో బాధపడే వ్యక్తులు ఈ మూలకం లభించే ఆహార పదార్థాలను తీసుకోవడం ద్వారా సమస్య నుంచి ఉపశమనం పొందవచ్చు. అయోడిన్ అధికంగా ఉండే దానిమ్మ, పెరుగు, స్ట్రాబెర్రీ, బంగాళదుంప లాంటి వాటిని మీ రోజువారీ ఆహారం ప్రణాళికలో చేర్చుకోవడం ద్వారా లోపాన్ని సవరించుకోవచ్చు.

Comments

Popular Posts